İstanbulda Rusiye ve Ukrayina eyyetleriniñ muzakereleri tahminen yarım saat devam etti. Çarşenbe aqşamı muzakere bitkenini ilk olaraq TASS ve «RBK-Ukraina» agentlikleri menbalarına esaslanıp haber eteler.
Muzakerelerniñ üçünci raundı episinden eñ qısqa oldı – birinci eki körüşüv bir saattan çoq sürdi. Aynı vaqıtta eki memleketniñ eyyet yolbaşçılarına, Vladimir Medinskiy ve Rustem Umerov umumiy körüşüv ögünde şahsiy körüşüv keçirdi.
TASS malümatına köre, taraflar vatandaş ve arbiy şahıslarnı almaştırmağa añlaştı. Ukrayina tarafı esas mevzular arasında ateşkes, esirlerni azat etüv ve prezidentler Volodımır Zelenskıy ve Vladimir Putinniñ körüşüvi oldı, dep bildirdi.
Kyiv Zelenskıy ve Putinniñ körüşüvini avgustnıñ soñuna qadar keçirmege teklif etti, dep bildirdi Umerov. Onıñ aytqanına köre, körüşüvde ABD ve Türkiye prezidentleri iştirak ete bile.
Medinskiy Rusiye Ukrayinağa elâk olğan ve yaralanğanlarnı toplamaq içün cebede qısqa ateşkes ilân etmege teklif etti, dep bildirdi.
Medinskiyniñ aytqanına köre, Ukrayina siyasiy, gumanitar ve arbiy meseleler boyunca iş gruppalarınıñ quruluvını muzakere etmege razı oldı. Moskva ve Kyivniñ ateşkes içün talaplarını qayd etken añlaşma sualine cevap berip, o, taraflar bağda qalmağa añlaştı, dep ayttı.
