Rusiye arbiyleri Harkivniñ merkezine eki idare etilgen ava bombasını attı, 16 insan yaralandı.
Şeer yolbaşçısı İğor Terehovnıñ bildirgenine köre, bombalardan biri çoq qatlı evniñ yanına tüşti, ekincisi – vatandaş müessisesine. Mesken ev yanında tahminen 15 maşina yana.
Vilâyetniñ arbiy memuriyet yolbaşçısı Oleğ Sinegubovnıñ aytqanına köre, yaralanğanlar arasında – 10 yaşında qızçıq, o, stressten ciddiy zarar kördi.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye yolbaşçılığı, Rusiye ordusı Ukrayinanıñ şeer ve köyleriniñ grajdan infrastrukturasına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
